Niege Schiller för gegen dat To-Gau-Foohrn

PlattsnackerABMoin leeve Lüüd!

Bi uns lüttet  Dörp Bargfeld süllt nu bald niege Schiller opstellt warrn, dormit de Lüüd nich mehr mit eere Blickkassens so gau in´t Dörp rinballert. – Dat wünscht mancheen sik tomindst.
Denn dat is kuum uttoholen, so luut is dat, wenn dor een Auto,oder noch wat schlimmer, een Laster, mit söbentig, achtig oder noch mehr Sooken an Dörpsschild vörbirauscht und denn erst in de Isen geiht. Dat mooken se aver ok nur, wiel denn de Kupp mit Linksbeegung op de Hööchte vun dat Füerwehrhus kümmt. Dor mutt man nämlich ganz scheun an Stüer rieten, wenn man dor mit gauer as Dörpsgeschwindigkeit fööhrt.
Düsse Straat is ja nu een Kriesstraat und so sünd denn de Lüüd vun Kries tostännig. Kott för de Kupp hebbt se irgendwann denn mol een Schild opstellt – so een Dreeeck mit rote Ümrandung und denn schwatten Strich, de op de Mitt no links afknickt (Teeken StVO 103-10). Sall vör de Kurv na de Kupp warnen, steiht dorto schreeben. Vun de anner Siet is keen opbuut worrn. Muttst aver liekers an Stüer rieten. Ik find sogor, dat man dor meist noch mehr oppassen mutt. Ok bi föfftig oder´n beeten weniger. De Hinwies op de Siet mit de Linksbeegung kann denn ja nur bedüün, dat se dorvun utgoohn, dat de Lüüd noch fofftig Meter no dat Ortsschild to gau ünnerwegens sünd. So´n halve Quadratmeter geelet Blick is ja ok gau mol to översehn, wenn man mit hunnert Klomotten de Straat hochkümmt. Süllt man leever all rechttiedig vörher de runden Schillers mit söbentig oder süsstig opstellen. Weer beeter. Avers de Beschillerung denken sik ja man Amtslüüd ut. Und de denkt  eben anners as annere Minschen. Dat´s ja bekannt. De Landkries is doch so groot in Blitzergeschäft. Künnt jo man een vun de Kassens in Bargfeld opstelln. Und vun de Innohmen buut se denn noch denn Radweg no Bahnsen. Dat´s doch mol´n fein Idee. Duert ok bestimmt nich lang, bit se de Dolers tosomen hebbt.

Bit dorhin let jüm man nich argern-

bit denn – und Foot vun Gas –

Niels

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.