Küll, nich nur biet Wedder!

PlattsnackerMoin leeve Lüüd,

de Winter het sik düt Johr  richti fastbeeten und de Bloomen, de sik bi de poor warmen Daag, de wi twüschendörch mol  harrn, ut de Eer truut hebbt, hebbt ordentlich een op de Mütz kreegen. Aber, wie heet dat för denn März bi de Buern: Negen Sommerdaag salt geven, doch de Küll is jümmers togegen! Nu, düt Johr hett sik de Wettermoker wohl verdaan…

Verdaan hebbt sik wohl ok de Börgers, de vunjohrn bi de Kommunalwahl eer Krütz bi de Klüttenpedders vun de „Christdemokraten“ mookt hebbt. De Nom is bi düsse Volksgrupp ja nich Programm, liekers doot se jümmers so. Dor is to´n Bispiel een, de dat Verleern wohl nich afkann und as son lütten Büxenschieter de nie Regierung „schäbige Politik“ ünnerstellt, und dat so kott no denn Wessel, wo doch nur de Versäumnisse und Schandtaten vun sien eegen Bagage bekannt woorn sünd.
Dat aber nu nebenbi, veel schlimmer is dat, wat düsse Lüüd sik ünner denn Deckmantel vun de „Demokratie“ rutnehmt. Ik weer vundaags mol to so eene vun düsse „denkwürdigen“ Versammlungen in Gerdau. Ik heev nur een Deel mitkreegen, aber dat, wat dor afgüng, hett för mi nix mit Demokratie to doon. Dat har wat vun eene Audienz bi´n Graaf, de sik op siene  Steebelhöller verlooten kann. De Anschien vun Demokratie mutt jo wahrt waarn und so geev dat denn ok´n Barg Afstimmungen- ehro Gnaden har dat ober gornich nötig to´n Uttelln optokieken. He wüss ja, dat sine Marionetten mooken wat he verkündet und all lang festschreeben har. Man kann nur hoffen, dat de Lüüd nu opwoken und düsse Minschen mit veel Präsenz bi de Sitzungen und mit veel Papier argern und bi de nächste Wahl dat Krütz an een anner Stell mooken.

So, nu noch wat anners – vundaags weern wi to eene Veranstaltung op een Öko-Hoff in Lütt Süss. Dor wöör us vertellt und wiest, wie dat so afgeiht mit dat Groottrecken vun de Dierten – vun de lütten Küken bit to eern „Letzten Gang“. Dat weer´n Barg Stoff und veele, ok unbequeme Saken, wöörn vun denn Betriebsleiter vertellt. Und dat se veele Kompromisse ingahn mööt, wiel dat to´n Bispiel nur noch överzüchtete Dierten givt – se nehmt denn de „am wenigsten schlechten“, wie us vertellt wöör.
Und eene annere Sok, de mi mächtig beindruckt hett – keeneen mookt sik wohl´n Kopp öber de Art und Wies vun de „Höhnerproduktion“ – wüssen jii, dat de Jungs glicks no dat Rutschlüppen ut´n Ei dootmookt ward? „Wenn se dat >good< hebbt, ward se vergast, wenn se Pech hebbt, ward se bi lebendigen Liev schreddert“, wöör us vertellt. Und dor givt dat nu een Tosomenschluss vun immer mehr Buern, de de lütten Mackers grottrecken. Dorför mutt man veer Cent mehr för dat Ei betohlen, aber dat is mol´n feine Sak, oder!?

So, dat weert erstmol wedder-

lett jüm nie argern!

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.