Een Hansestadt sünner Hansespraak?



PlattsnackerABLeeve Lüüd,

nu hett de Kriesstadt een Vörnaam – „Hansestadt„. Dat is een scheune Saak un bringt Uelzen sachs na vörn. Of dat nu een nieget Nummernschild givt? – HUE! Dat kann denn ok glieks as Opfordern seehn warrn. Se süllt mol to Pott kamen! Denn blots de „Titel„ dreegen, dat kann nienich allens ween. Dor höört noch mehr to. Geihst dörch Uelzen, höörst hier Hochdüütsch, dor Gossenspraak. Aver de verleden Amtsspraak vun de Hanse, de is nich faken to höörn. Wenn ik de een of anner in Uelzen dreepen do, denn ward op de Straat Platt snackt und de vörbigaahn Lüüd kiekt heel scheel, wieldat se dat nich kennen doot. Anners muttst jümmer een heele Maand töven, bit bi een Plattsnackerdreepen wedder wat op Platt to höörn is. Dor muttst denn hingaahn of in een vun de Dörpen ümrüm fohrn. Dor höörst dat ok meist ni mehr, aver dor kannst ok to een Krink tohöörn. Platt is een Nischenspraak – de Lüüd dreept sik bi een Kröger of in een Gemeenhus un leevt för een, twee Stünn in een lütte „platte„ Welt. Woanners kannst denn faken nich mol snacken. Dor ward denn plattdüütsch Kost „serviert„, viellicht ward tohoop een, twee Leeder sung. Is ja ok wat. Keen dat mag, ward woll  sien Amüsemang hebben. Aver ik weer ja jüstemang vun Uelzen an vertellen. Wat is een Hansestadt sünner De Hansespraak!? Nich veel, oder wat meent jii? De Naam is nie, nu süllt se mol glieks dat heel Programm ümsetten un de Lüüd dat Plattdüütsch biböögen. In alle Schoolen as Plichtprogramm un för de Verkööpersch un de Verkööper as Kurs bi de Volkshochschool! Dat sull woll een Plicht un een Ehr för de Stadt un de Lüüd ween, dat ümtosetten! Bis dat so wiet is, gaht wi na de Krinks un töövt op de goode Botschapp, de een Dag ümgeiht – wenn de Lüüd vun alleen in un op de Straaten wedder Mudderspraak, Hansespraak snackt un höörn doot!

Ik höög mi al rein dull dorop- jii ok!?

Niels

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: