Dood bi´n Slachter

PlattsnackerABMoin leeve Lüüd,

nu is dat also würklich woorn – de Rat hett sik – viellicht een beeten vörielig- för dat Dootmooken in tokamen Winter vun de Eek bi´n Slachter in Gerdau utsprooken und ofschon dat een Bitten in de Inwohnerfroogstünn bi de vörletzte Ratssitzung geev und de Tosaag, bi denn Naturschutzbeopdraggten notofrogen(!), vun den niegen Schultheiß dorto- is de Winter op eenmol dorween und se hebbt denn Boom fix op de Siet neiht…  So is dat endgültig und Sluß! Avers bi de letzt Ratssitzung geev dat nu Opklärung- De niege Schulz hett nofroogt, wohl bi´n Umweltamt. Und de hebbt em vertellt, dat dat Ümhaun vun so een Boom, de üm und bi söbentig Johr old is, wohl bi düsse „Diagnose“ losgoohn kann. Tja. Und nu is he wegg, de Boom. Is man schood, avers is wohl ok  richti loopen. Dor kann man sik över strieten, avers nich meckern und nörgeln as de een oder anner dat bi jede Gelegenheit mookt. De Stieg mutt nu noch wedder glatt mookt warrn, dat döffen se nich ut´n Oog verleern. Nich dat dor noch een vun de Nörgelköpp in´t bleiern kümmt und op de rote Nees fallt.

Op de Nees fulln is  wohl ok de ole Schulz vun de Samtgemeen mit sien „Geele Korten“-Speel. Viellicht wull he sik dormit noch een Denkmol setten, avers dat hett wohl nich klappt. Ik weet nich, of dat överhaupt noch wieter verfolgt ward vun de Verwaltung, avers de Indruck is wohl eher een „Nee!“ – de Gossen seet nich beeter ut. Und de Vörbildfunktion vun de Gemeengossen is ok wohl eher dat Gegendeel- dor süht dat deelwies  richti leeg ut. Dor passeert nix oder tomindst nich veel. Also, man ran, leeve Lüüd ut Verwaltung und vun Buhoff! Jii ward för´t Arbeiten betohlt!

Nülichst weer ik mol to Stadt. Door, wo de Ul ok giern mol mit „h“ schreeven ward. As ik so dörch de Strooten güng, is mi wedder mol wat opfullen. De Börgerstiegen sünd oftens al so krumm und scheep, dat een meenen kunn, dat hört noch allens mit to denn freedensrieken Bohnhoff! – Genau; dat´s doch överhaupt een Idee! So kann de Verwaltung, de dat jo mit dat Reeknen nich so hett, as in dat Dagblatt notolesen weer, een poor dusend Doler rinhoolen. Se deklariert eenfach alle Wegens und Strooten as „frie no Hundertwasser“ und bruukt denn nix mehr to mooken. Höchstens mol een Lock in de Stroot dichtklein – an besten mit een Hümpel, vun wegen de wullte „Scheefigkeit“. Fein Idee, oder!? Sogor de Tourismus kann dat denn noch för sik nutzen; dorför mütten se viellicht een poor vun de Steen und Hümpels klöörig anmolen. Föhr de Ehr, versteiht sik vun sülm, kusten döff dat jo nix.

Wüssen jii eentlich, dat de „Footgängeröverwege“ op unse scheepen Strooten erst siet föfftig Joohrn de Footgängers ok denn Vörrang geevt!? Ik heff dat mol noleest, wiel ik de Daagg mol in´t Grüveln doröver keem. Ik wull över so een Wegg loopen, stünn an de Kant und töövte op dat Anhoolen vun de ankoomen Fohrtüügen. Vun de een Siet keem een, de wöör marklich langsamer. Fein, heff ik dacht, denn kann ik jo nu losgohn. Ik keek nocheenmol no rechts – dor keem een griese Mercedes ansuust! An´t Stüer een olen Mann mit Mütz op´n Dötz. Tachentig weer de mindst, dach ik so bi mi. Düsse ole Kerl is as so een Formel-Een-Pilot ohn Kieken, ohn Bremsen dörchrauscht. Und ik weer bannig froh, dat ik noch nich losgoohn weer. Tja, und denn keem mi dat in Kopp, dat he viellicht gor nix dorvun weet! He is tachentig und de Plicht för de Fohrers to´n Tööven givt dat siet 1964. Denn hett he woll sien Lappen dorför mookt, heff ik so dacht, und nümbs een hett em watt vun de niege Regel vertellt! De arme Mann! Fööhrt siet Johrteinten op de Hundertwasser-Strooten und meent, he hett inbuute Vörfoohrt! Nur, wiel se em nix dorvun vertellt hebbt! Dor kunn he woll heel froh ween, dat de Footgängers jümmer op sik oppassen und sik vör em woohrn!

So, nu lett jüm man nich argern-

ik wünsch ju een scheune Adventstied-

bit to´n nächsten Mol

Niels

Und nich vergeeten – an 29.11., Klock fiev an Nomiddag is Adventssingen mit denn St-Remigius-Chor!

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.