De Penunzen leegen an de Straat

PlattsnackerABMoin leeve Lüüd,

de Sommertied is doch een scheune Tied – man kann meist denn heelen Dagg buten sien und ok veele Wege op´n Drahtesel afnüddeln. Good; dat een oder anner Mol kricht man een natten Buckel, avers, wie heet dat so scheun, man is jo nich ut Zucker.

Ut Zucker is man leider  nich de Schiet, de an de Staatenkanten liggt, sonst wöör he sik  jo oplösen… Allens, wat de Lüüd nich mehr bruken oder wat to Hus keeneen mitkreegen sall, ward wegballert und dor sünd männigmol ok Schätze bi – Dosen und Buddels mit Pand op! Ik heff all op een Streck vun twee Kilometers meist twee Euro tosomensammelt. Dor kann man mol sehen, wo good de Lüüd dat doch geiht, wenn se eer Geld s0 ut´n Fenster schmieten. Armet rieket Düütschland… För dat Opheben vun dat Geld, also anholen, afstiegen, opböörn und insteeken und wedder wieterfohrn, heff ik so söben bit acht Minuten för de Streck brukt, hochrekent op de Stünn sünd dat so üm und bi fofftein bit süsstein Euro. Dat is doch mol een Lohn, de sik sehen loten kann, und denn ok noch stüerfri! Dormit ik denn Schnitt holen kann, bruukt dat Noschub – also leeve Michels, de eern Breegen nur af und an mol inschalten, jümmer rut mit de Panddosen! June Zigarettenschachteln und annern Schiet künnt jii avers tohus entsorgen!!!

De Sommer hett avers ok een lütten Nodeel – de Sport hett Fofftein! Keen Schweeten an Dingstagg! Nu mut ik bit September darben! Avers dat givt jo noch dat Sportafteeken, dor givt dat de Möglichkeit, sik to betätigen! Und as Prüfer mookt dat ok bannig veel Spooß, wenn dor de een oder anner Sportler kümmt und sik versöcht. Bi mien letzte Afnoohm har ik wedder de Ehre  een Sportafteeken „fertig“ to mooken! Mien hartligen Glückwunsch, Jupp,  to  dat negenundveertigste Sportafteeken! – und nächstet Johr mookst Du dat föfftigste! Dor ward de Höchste in Heben all för sorgen, dat du dat wohl hinkreegen sast!

Dat Tohölpen bruuken wohl ok unse Footballspeelers bi de WELTMEISTERSCHAFT! No denn furiosen Start gegen de Portugiesen hebbt se gegen dat Team ut Ghana bannig Glück hat. Und nu hebbt de Portugiesen de Amis eenen Punkt afrungen und allens is wedder oppen in de Grupp. Allens is möglich und jedeen hett dat in de Hand, nee, in denn Foot oder Kopp, siene Nation in de nächste Runn to bringen. Drücken wi de Duums, dat unse Jungs dat hinkreegen – gor nich uttodenken, wat dat för´n Gehuul und Liekenfleddern givt, wenn se rutfleegen wörrn!

Avers dorvun geiht de Welt nich ünner und wi looten uns nich argern (nur´n beeten viellicht) –

bit to´n nächsten Mol –

Niels

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.