De Klock is wech (und annere fehlt ok wat!)



PlattsnackerABMoin leeve Lüüd,

jüm is dat bestimmt ok schon opfullen – in Soborg is de „ol‚ Aftheker-Klock„ – dor wo siet‚n poor Johrn de Diertendokter bin is – afbuut worn. De Klock, de wohl veele vun de Schölers und Pendlers an fröhen Dag doran erinnert hett, dat se nu‚n beeten gauer in de Pedalen peern müssen, dormit se de Toch ni för de Nees wegföhrt. Af un an mol weer düsse Tiedwieser ja twei und de Lüüd müssen denn forts to de nächste Klock bi de Sporkass eilen, aber bi de „S„-Klock har ik ninich‚n goodet Geföhl. De Temperaturanzeige har deelwies‚n Afweekung vun süss Grad, kunn man sik dor denn op de Tiedanzeig verlooten!? Aber dat Datum weer glöv ik jümmer dat richtige… wenigstens wat! Trüch to de anner Klock: Jürgen, em gehört se, het seggt, dat dat mit dat Dings ganz komisch weer, in Winter weer se dat to kold und in Sommer hett dor oftens mol de Blitz rinhaut und se weer allwedder twei. As he mi dat mit een Oogenblinkern vertellte, dach ik to mi, wie bün ik blots all de Joohrn to rechte Tied an Bohnhof wesst!? – Ik har mi doch jümmer op düsse Klock verlooten!

Letzt Maand weer ik to‚n ersten Mol to Besöök bi de Eimker Plattschnackers. Junge di, dat hett mi good gefullen und wi hebbt‚n barg wat to Lachen hat. Dor keemen so‚n goodet Dutzend Lüüd tosomen, de meisten schnackten denn ok platt, ober‚n poor hebbt sik ok infunnen, um totohören, dat schnacken traut se sik denn wohl‚n annern Mol. Platt heff ik denn aber endlich mol ohne „Veranstaltung„ schnacken kunnt, as ik denn twee Lüüd vun de Eimker Runn‚ bi eene Veranstaltung vun Kreissportbund droopen heff- ok dat weer richtig fein und ik wünsch mi, dat veel mehr Lüüd sik traut und dat Plattschnacken bald weer to‚n Alltag hört. Lüüd, traut jüm ruhig, dat löppt denn irgendwann vun ganz alleen!

Vun ganz alleen löppt ja ok dat Drieben vun de schwatte Garde in Gerdau – bi de letzt Ratssitzung, de se ja schlauerwies an dörtichsten April ansett hebbt, dormit wohl keen oder tomindst nur‚n poor Börgers dat Gewese mitkreegen, hebbt se wedder de totale Demokratie, so as se se utleggt, an‚n Daag leggt. Ik bün erst ‚n betten later dortokomen und heff ni dat ganze Spektakel mitkreegen. Erst  geev dat groot Geschrei wegen „Anfragen„ vun twee interessierte Börgers. Dor sull över de Anwort afstimmt warrn. Toerst har sik de Vörsitzende ziert, aber denn hett he de Breefe vun de beiden doch noch för de Tohörer vörleest und de Antwort dorto. – De weeten noch nich mol wat in dat „Rats- und Bürger-Informationssystem„ för de Lüüd to lesen is und wat nur  de Ratsmitglieder bekieken künnt. Und dat de een oder anner gor keen Internet hett, wulln se ok toerst nich glöben. Dat Indrucksfullste weern denn aber noch twee Utsagen vun een Ratsmitglied vun düsse Mehrheitsfraktion. Ton eenen meen he, he müss in Schoolmeisterart de beiden Börgers belehren, dat se sik bi eere Ingaben op de verkehrten Paragraphen beropen harrn. Ik heff dat noleest- und kann nur seggen: In de Worth is wohl de Wurm bin. Leider weern de annern Ratsmitglieder vun de Opposition nich dorop vörbereitet und kunnen nich glieks kontern. Ik bün aber sikker, de beiden Börgers hefft dat intwüschen richtigstellt.

Ton annern hett düsse Minsch, wohl nich ganz bi kloren Kopp, weil he sik noch so öber siene öberhebliche Belehrung högt hett,vertellt, dat de Beschlüsse ja nich in‚n Rat, sondern bi de Sitzungen vun siene Fraktion fastleggt warrn. Dat is Demokratie, Lüüd!

Denn weern dor ja noch de annern „Verfehlungen„ to bewunnern – De Vörsitzende har nix mookt, as twee vun siene Lüüd sik in deelwies beleidigender Art öber een Ratsmitglied vun de Opposition utleeten. He mischte sik sogar noch in und nöhm ok dat Wort, obwohl he dat as Vörsitzender luut de Statuten gor nich döff – dorför mutt he de Vörsitz afgeben und sik denn to Wort melden, sowiet ik weet.

As denn aber de Opposition anterte, schreet he forts in und rügte dat Ratsmitglied sogar dorför, dat seggt worrn is, dat dat ja gor keene „sachliche Diskussion„ bi de Ratssitzungen geben würr. Dat kann ik aber as Tokieker bestätigen und ik glöv, ‚n Barg annere Börgers künnt dat ok.

Aber, Lüüd, wi leeten us ok vun düssen nien Akt vunt „Komödiantenstadel Gerdau„ nich argern und beluern dat Speel wieder…

Bit to´n nächsten Mol!

 

 

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: