De Baas hett dat Seggen



Leeve Lüüd,

dat fööhlt sik  nich goot an, wenn de Baas sien eegen Lüüd as nich in de Laag dorstellt, de Arbeit richti to maaken. Sachs kennt jii dat ut de eegen Bedreev, wenn dor so een Morsfidel an warken is. In grooten Stööl beleevt wi dat de Daag bi use Suldoten. De Baassche pultert loos un ünnerstellt eehr Bundeswehr, dat se een Problem mit dat Führen hebbt un versüümt hebbt, dor beter för optopassen, dat dor to veel „rechtet Dinken„ in de Truppe to finnen is. Keen hett denn dat Seggen un mutt dorför instaahn, wenn dor wat dwars löppt!? Dorvun mol af, dat de Suldoten ok blots een Afbild vun de Sellschapp sünd, is dat doch al een Oart  Verrat, wenn se so lamenteert, as se dat hett. Un denn doch wedder trüchstulken, üm de eegen Huut to waahren. Bi de Suldoten wöör man woll „Feigheit vor dem Feind„ seggen un denn weer dat dat mit de Karrieer… Aver is bald Wahl un Flinten-Uschi meent, dat se so goot dorvun kümmt. Ik hoff blots, dat de Wäählers sik nich an de Nees rümführn laaten un sik dat bit to de Wahl marken un bi dat Ankrüüzen in de Kabiin denn dor an vörbi kieken.

Un givt noch een Grund, düsse Lüüd nich stark to maaken – eentli döff doch keen klooge Buer mehr de Swatten wählen, wenn he dorop kieken deit, wat ehr Minister in Bund se för dumm verköfft – Deertenwohl, een Slagwoort, dat dat in sik hett- denn noch een Initiatiiv dorvör ut de Dööp to helpen implezeert ja, dat de Buern dat dor nich so mit hebbt… Denn wöörn de Lüüd, de dortegen demonstreert, also doch Recht hebben und de Fraag, keen denn nu löögt, hett een Anter kreegen. Un denn geiht ja noch wieter… wenn denn de Bregensmalt vun de Minister denn waahraftig  een Verbeetern vörhett, denn hett he woll bi de Taahlen de Nullen verwesselt. Denn müss dat doch ehrder so ween, dat söventig Milloionen  Dalers för de Buern sünd un söven Millionen  för dat Bewarven… Aver so is dat ja man nich, also doch blots wedder Lobbywark un noch een „Label„, dat dat höörige Volk wiesen sall, dat billig doch goot is un dat de Deertenproduktschoon as se hüüt bedreven wart, supergeil un richti is. Kann so een Dinken vun een Vereen kamen, de dat „christlich„ in sien Naam hett!? Ik heff dor so mien Twiefel un weet, dat ik dor mien Krüüz nich maaken waar. Woneem sall de arme Michel (dor sünd ok de Fruunslüüd mit meent) aver sien Krüüz maaken? Bi de AfD? – Fallt ut, de Ansichten, de de hebbt, döff keeneen för waahr nehmen, de blots een beten wieter, as över sien Neesspitz rut, dinken deit. Ok un al gorni „ut Protest„. De roten Socken…. hmm. Ik mutt togeven, de Martin, de hett een heel gooten Snack ansett. Man is dat ok to glöven, dat he dat, wat sien Genosse Schröder vör Joohrn mit de groote Sozialkettensaag tweischneen hett, wedder richten kann? Dat hett een bitter Bigesmack… De Gröönen… wat hebbt de utfreeten, dat se in de Ümfraagen so in Keller fullen sünd? – Se hebbt keen „Standing„, as dat hüüt heet. Keen Faaden uttomaaken. Se hebbt de „Urthemen„ wedder ruthoolt ut de Mottenkist… Över de Joohrn vergeten un vun de Konkurrenz besett, sall dat nu dat Rezept ween!? Dröömt wieter… Mutt ik doch noch Kommunist waarn op de olen Daag? – Man goot heff ik ok noch een paar Maande Tiet mi dat gründli dörch de Bregen gaahn to laten.

Blots een – een weet ik hüüt al nipp un nau- wenn´t sowiet is, gah ik dorhin – denn to Wahl gahn, dat is boverste Plicht in een Demokratie, de wi ja man goot noch hebbt un ok bewaahren wüllt, wüllt wi!?

Denn besinnt sik man ok all un lett jüm bit dorhin nich argern!

Niels

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: