Dat Massaker hebbt wi al



PlattsnackerABMoin leeve Lüüd,

nu is de erste Maand vun´t niege Johr al wedder dörch und dor is al een Barg los ween. Allens vergeeven! stünn bi een Karikatur in de Gazetten, de sik dat truut hebbt! Is dat allens vergeevens!? Op in Lütten oder in Grooten. De Welt is mall. Und jümmer mehr Lüüd erkennt dat und wüllt dat Wassen üm jedeen Pries nich mehr mitmooken. Und dorför sünd se ok op de Stroot gohn – Föfftigdusend weern in Berlin, üm de Geldkaste und de hörige Politik to vertellen, dat se dat satt hebbt! Wi weern ok mit een lütte Afordnung dorbi. Kunnen ruhig noch een poor mehr ween, avers, as vertellt wöör, de een oder anner vun de  veelehrigen Lüüd weer dat dree bit veermol Ümstiegen bi´t Bohnfohren to veel. Dor full mi nix mehr to in as schüttkoppen und swiegen… Avers bi de Demo hebbt wi denn örntlich mitbrüllt! Jümmer mehr Lüüd sünd nich mehr inverstoon mit de Oart und Wies, de to veele Buern (de jo eentlich keene mehr sünd) as Handlangers vun de Industrie as Wiesenhof und annere se an den Dag leggt. Avers dat givt Lüüd, de meent, wenn se de Swien denn Ringelsteert afsnien oder de Höhner de Snabel afkniepen, doot se wat Goodet und setten sik för dat Deertenwohl in. Stünn nülichst jo in´t Dagblatt notolesen. De Buern-Vörsitter keem blarrnd ut Berlin vun de „GrüneWoche„ trügg und hett wiesseggt, dat dat nu een Massaker geven ward, wenn de eische Meyer dorför sorgt, dat dat de Dierten leeger geiht! Jo, dat geiht se nich beeter, Lüüd – se mütten lieden, wiel de eische Minister dat Steert- und Snabelkötten verbeeden will! Dat hört sik avers ok nich, oder?  Minschen, de bi´t Geldverdeenen stört, mütten wegg! -Lüüd, dat wiest doch, wo mall düsse Welt is und woveele Lüüd een malle Denke hebbt! Süllt se de Deerten as Gottes Kreaturen behanneln und se nug Platz und Tied geven, denn ward de Lüüd ok eern Deel dorto bidreegen und eern Doler bistüern. Sall´n se ophörn mit eere unwürdige Oart, denn bieten sik de Swien ok nich mehr blöttig und de Höhner mütten nich alle twee Dag Antibiotika hebben.

Mit denn Ackerbu is´t nich veel anners.Een annern Dag stünn ok in dat Dagblatt to lesen, dat de Sprüttmittel, de op de Scholl sprütt ward, all nich leeg sün. Solt is veel leeger, stünn dor, und eentlich hört de Soltputt in de Giftkommer. Und nich de Sprüttenmeisters und Randstriepenwegplöögers sünd dorvör verantwortlich, dat dat kuum noch Niederwild as Fasan und Rebhuhn und de Heidelark givt – nee!! -De Umweltschützers und de Wolf sünd de wohren Schuldigen! Mann in de Tünn! Dat is mol een opklärende Ansoog! Wi hebbt genug groote Maisfeller. Dor is Deckung nugg för dat Niederwild, stünn dor, dat kann also nur an de Lüüd liggen, de de Raubvagels und Isegrimm schützen deen.

Ik mag dor man nich so ganz an glöven. Avers – de Sook mit dat Solt, de mookt mi nodenklich… Wi weert denn, wenn de Industriehörigen dat Solt in eer Giftkommer wegslüüten deen und sik eer Monsanto in de Arfensupp schütten. Denn sallt dat Niederwild wohl bald beeter gohn, de Wolf ward ok nich allens wegfreeten und de Umweltschützers bruuken nich mehr to demonstrieren op de Stroot gohn und op lütte Flagen een lütte heile Welt fastholen.

Und Verhungern ward in uns riek Land ok keeneen, nur wiel dat keen Billigfleesch und Giftkorn mehr to kööpen givt. Und dat ward mehr Buern geeven, de nich för de Konzerne produzeert, se warrn eern Afsatz to Hus in eere Region hebben. Se mööt dat nur wullen. Und de Verbruukers ward wohl mitmooken. Und denn künnt se eer Göörn  ok wedder een echte  Fasan und dat Rebhuhn und de Lark wiesen. Dorför mööt se se denn nur noch vun Smartphone und Computer wegkreegen! Ik hör dat al de Lünken vun´t Dack piepen!

Let jüm nich argern-

bit to´n nächsten Mol

Niels

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: