Blööd loopen- Vun de Groote Politik 9/16

Nu hebbt se denn Salat – över twintig Perzent hebbt de „Blauen“ in Meckelnbörg holt… de tweete Partei achter de roten Socken. Sülvige hebbt örntli Feddern laaten, man dat reckt jümmers noch för´t regieren. Hebbt se aver Sott hat, de „olen Volksparteien“.

Blots de Gröönen, de hebbt nich mol mehr Oppositionsstatus, rutflogen sünd se. Kreiht in Meckelnbörg keen Hahn na. Liek so de NPD. Man de Nazis blots, wieldat de ehre Wählers nu ok de AfD wählt hebbt.

Een gräsige Saak för de heele Republik, leeve Lüüd. Ok wenn de een of anner vun de „Etableerten“-Wählers ut Protest de AfD  wählt hett, dor mutt keen doch de Bregen anknipsen un mol in de Tokumst denken…! Dat weer doch aftoseehn, dat de mit ehr Parolen al de vun de regierenden Politikers in de verleden Joohrn afhängten „eenfachen Lüüd“, de op dat verdwarste Gesabbel rinfallt, för sik wunnen hebbt, denn kann een doch nich so bregenklütterig ween un dat noch wieter vörandrieben!

Is dat dat Volk vun Dichters und Denkers!? Armet Düütschland, de Michel  löppt al wedder in de verdwarste Richt!

Op anner Siet is´t an de Tied, dat de Grootkupperten dat Volk ok mol tohöört un nich eenfach utblennt, wat se bang sünd. Aver dat is ok een groot Problem. Dat givt oogenschienlich blots twee Meenen – büst du för de Hülp, givt dat keen dortwüschen, denn mutt dat allens „Goodmenschentum“ ween, föhlst di beten melanklööterig mit dat een of anner Doon un seggst dat luut, büst glieks een „Rechte“… dat passt doch ok nich tohoop, leeve Lüüd! Aver so schuuvt man de Demokratie in´n Dutt! Also, nich jümmers glieks in een Schuuv packen, sachs ok mol tohöörn un de Lüüd verstohn und stütten! Worum nich ok de Düütschen,de nich klor koomt, bi de Hann packen un mit se to Amt goohn, se hölpen as se dat mit so veel Insatz mit de Syrers (un anner) mooken doot!

Unbenannt-2Viellicht as Verbinn, as echte Versöök vun „Völkerverständigung“ – nich mit twee of dree Flüchtlinge losloopen, nee ok anner „Bedürftige“ to Hölp kamen! (Ik weet, de Stütt för de Lüüd givt dat al, man nich in de Ümfang – dor kiekt keeneen op, wieldat jümmers blots vun Flüchtlinge snackt ward!)

Tosomen – nich tegen – denn bruukt keeneen Minsch de völkischen Bangmookers. Nich hüüt un nich morn! Un dat gellt ok al bi de Kommunalwahl!

Woohrt jüm!

Niels

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.