Besöker wüllt se nich



PlattsnackerABMoin leeve Lüüd,

dat givt ja scheune Landstriche in uns Samtgemeinde, und ik denk mol, dat is nich verkehrt, wenn ik segg, dat ok unse Gegend sik nich versteeken brukt und gerad wiel dat noch so scheune Ecken givt, is dat doch de best Gelegenheit, dormit to klotzen und´n Barg Besökers hertolocken, dormit se „eer Bestet„ bi uns looten. Man irgendwie schient dat nich so to klappen und se koomt nichso recht  in Gang, de „Touristiker„. Dat givt Verbände und Vereene und dor mutt man wohl irgendwie een Deel vun düt Getriebe warrn, dormit dat denn ok fruchtet.Aber dat givt – ik heff dat jo all´n poor Mol in miene lüttje Schrieberie erwähnt- jümmer wölk, de seht dat  wohl as een Problem an. Nich de Penunzen, de de Besökers mitbringen, ne, de kann man mitnehmen. Aber wat dorför doon oder gar in de Tokunftsplanung inschrieben, dor wüllt se üm´t Verrecken nich bi. Denn dat kunn jo Aggewars mit de Grotstallplanung geben, wenn man sik denn Tourismusschiet op de Fohn schrieben deit. Nee, denn leever dat  fixe Afnicken vun grooten Schiet, wo denn de Schwien und de Höhner in kötste Tied „erntereif„ mokt  ward, dormit dat Blood ut denn  Moloch in Wietze ohne Ünnerlass rinnen kann und all de Bedenken, de mit sowat wie Geweten oder so´n Dummtüch to don hemm künnt, nich an sik ranlooten – denn mit groote EU-Ünnerstützung meent se, dat se nu riek warrn… Oder sünd se wirklich so arm in eere Breegen, dat se dorvun öbertüggt sind, op düsse leevensverachtende Art „ehrliches Geld„ to verdeenen.Viellicht sünd de Tourismusvereine  all ünnerwannert?  Wer weet… Se weeten nich wat se do´n, aber dor is ok keeneen de se vergeben ward, dorvun bün ik öbertücht.

Nu to een schöneret Thema(ik glöv da is mindst een, de all mit Spannung und viellicht´n beeten bangbüxig tööft het op mien „Ansprook to´n August„)- Ik bün nu no een lange Tied mol wedder to de Plattsnackers in Hössen ween, um mi dat Duo Kandidel, Hannes und Uli, wedder mol antohören und um ok mol to luern, wat denn sonst noch so dreeben ward. Ik keem dor denn ok mit miene üblichen poor Minuten Verspätung an und dor weer de Musik all in Gang. Dat hörte sik wedder bannig good an, wat se dor speelten. Een Deel vun de „Eimker Runn„ weer ok dor und so har man ok glieks wat to vertelln. An de anner Dischen seeten´n  ganz Dutt annere Lüüd, aber mi full op, dat dor veele gor keen Platt schnackten, ofschon se dat vun Öller her eentlich künnen müssen… Na, schad ja nix, wenn se tohört is dat jo ok schön.  So richtig in Gang keemen se denn as de boberste Plattschnacker dat Eeten utreep, wat wohl to´n „Sommerfest„ tohört, heff ik mi seggen loten. Dischwis stellten se sik to´n Eetenfaten an und denn weer mit de Begleitung vun de beiden Kandidels erstmol … Stille.
Twüschendörch geev dat denn noch´n poor Opführungen vun de Volkshochschool -Schölers , de wat instudiert harr´n.
No twee Stünnen weer dat denn vörbi, dat Volkstellen harr beeten över söbentig Lüüd bröcht und no dat „gemeinsame Singen„ geev dat noch een Adjüs vun denn Schoolmeister und de Lüüd güngen no Hus. Ik bün denn noch to Uli und Hannes op´n kotten Schnack und wull eentlich noch vun denn Beschwerdeführer, de ok dor weer, een Antwort op mien Frog vun letzte Maand kreegen, awers, as ik mit de Musikers toend sabbelt har, weer de all utbüxt. Ik har kott dacht, as ik an em vörbi bün, schnackst em nu an, awers he wer ok mit Sabbeln togang, so bün ik denn wiedergohn. He har mi schon biet Ankoomen so beluert und siene Lüüd  keeken mi so dwars an, will he viellicht gor keen Pries gewinnen(kannst nolesen in de letzte Utgav, de Nr. 217)!?

In de Gemeinde Gerdau gaan de Klocken ja anners, dor verschwinden Ünnerlagen und allerlei komischet Tüch ward dor vun de Volksvertreters beschloten. Ik heff mi biet Loopen dacht, dat kann ik doch ok und bünn denn no instimmigen Beschluss mit mi op de Straat mit´n Mors vöran öbern Asphalt jackelt. De Autofohrers,de „achter mi ranfohren deen„ hebbt mie ganz scheef ankeeken , hupt hett awers keeneen. As ik so all hundertföfftig Meters achter mi har, keemen mi Bedenken (ik bün ja keen Politiker), denn, wat hebbt se uns mol bibröcht? – Man sall denn Verkehr entgegengohn…Dat hett ja wohl denn Sinn, dat man sik in de Oogen kieken und de Situation afschätzen kann. Awers wo sall ik dat nu moken? Ik tominst heff keene Oogen in Achterkopp… Mutt ik de Stratensied wesseln, wenn ik trüchwards loop? Denn kann ik de Autofohrers in de Oogen kieken, loop awers in de lieke Richtung as de Verkehr… Mann inne Tünn-Nu weer ik in de Bedrullje! Is dat noch na Recht und Gesetz, oder mook ik  mien eegen Ding ohne mi üm dat Wohl vun de annern to scheren? Ik bün denn mit mi eenig worrn- ik bünn op de linke Sied bleeben und jümmer, wenn mi een Blechkist in Wech keem, bün ik för´n poor Meter mit de Nees vöran loopen.  Düssen Beschluss war ik nich in´t Amtsblatt setten und trotzdem hol ik mi doran!!!

Also Lüüd, lett jüm nie argern-

bit to´n nächsten Mol!!!

P.S.: Wer de Muus noch nich funnen hett- se sitt op den rechten Maun vun denn Buern (nur in de Druckutgav). In´t Netz heet de Muus NT!

 

 

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: