Belevnisse mit Gedicht



PlattsnackerABMoin leeve Lüüd,

nülichst weer jo de Aarnfier. Dor weern wi to Kark in Gerdau. Dat Gotteshus weer würklich scheun schmückt und de Gottesdeenst weer noch beeter besöcht as sünst. Dat hett all richtig good doon und de Paster Kardel hett dat wedder moij hinkreegen. Op denn Wegg no de Kark und ok trüch is mi denn wedder opfullen, dat so veel Appeln und Beern eenfach op denn Böön leeg. Nich nur an de Strooten, ok in de Goarns weer dat to bekieken. „Sünd de all nich kloog!?„, heff ik mi dacht, „Worüm looten se dat all verkoomen!? Und denn kööpen se sik de Appeln ut Südamerika oder Nieseeland.„ Kann ik nich nofulltrecken. Dor full mi denn een Gedicht dorto in: Dat Gedicht heet „Ribbecks Arven„:

 

„Herr Ribbeck is gohn

Dat´s lange Tied her

Hett Goodet uns doon

Geev uns Appel und Beern

An Strooten, op Wischen, de Appeln hüüt gammeln

Und so geiht dat ok de Beern

Kuum een magg se sammeln

Hebbt Schorf und sind schietig, hebbt de Lüüd nich gern

Esst mehr Obst“ priest de Werbung uns an

De Lüüd wüllt good to Wegg sien und mooken sik los

Holt „Pink Lady“ ut Chile sik dann

De is glatt und schier und all sünd liek groß

Doch seht se een Appelboom bi´t Harvstflaneern

Koomt se in´t Schwärmen vun dunntomolen

Se süselt:“ Ach, wat plöck ik as Kind di gern! -

Mutt glieks vun Discounter noch Appeln holen!“

Düt Gedicht und een Barg anner Geschichten heff ik an 17. vun Oktober in denn HÖRSAAL vun Jan Kukureit vördreegen. Dat weer een moije Veranstalten und de Tohörers und ik sülm ok harrn een kommodigen Avend tosomen. Klock acht bün ik anfungen und kott för tein weert denn toend. Sogor Besöker ut de Gifhorner Eek weern dor und hebbt sik moij amuseert. So wöör mi „ut erste Mund„ vertellt. Hett mi höögt as dull. Een Week later op´n Dünnersdag weer in Lümborg Schoolmesterdag. Dor har ik mi ok to´n Wieterbillen anmeld. Weer ok een fiene Sook. Hebbt sik bannig Mööchte geeven und dat geev nich nur viggelinsche „Workshops„. Ok een Führung dörch´t Salzmuseum op Platt weer anseggt – hett Ekhard Ninnemann mookt, de schrivt ok Kinnerbökers, nich nur över de Sülfmeester vun Lümborg. Ik heff noch mit em klönt und wi harrn een fienen Uttusch. So mookt dat Spooß und ik frei mi all op een nächst Dreepen. Und op wietere Lesungen. De finn ik to scheun. Ik söch noch een Musikus, de mi bi de Lesungen een beeten ünnerstützen mag. Wenn jii een weeten oder sülm Lust dorto hebbt, de plattdütsche Sook wedder mehr ünner de Lüüd to bringen, denn meld ju man bi mi! Wöör mi bannig höögen.

Bit to´n nächsten Mol-

lett jüm nich argern

Niels

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: