As man mit Lüüd ümgeiht



PlattsnackerABMoin leeve Lüüd,

dat wi uns nur een poor Weeken vör de Wahl för de niee Regierung befinnen, dat markt man an de noh Geldbüddel vun de Parteien opbammelten Plakate- de schwatte Garde hett gaaanz veele an de Lanternen tütert, de roten Socken hebbt sik ok ni Lumpen looten, vun de Ökos und de annern mit de Oogenklapp süht man af und an mol een Bild, ik glöv vun de SED-Nofolgers heff ik ok mol een too Gesicht kreegen – man, wo weer dat noch gliks? Is jo ok egol, seggen de meisten vun ju – „Ik mook mine Krütze dor, wo min Vadder se ok all mokt hett!„ Oder „Ik kann de ganzen Fratzen nie mehr sehen, de löögen und bedrögen doch all, ik go gorni to düsse Veranstaltung!„  Und denn givt dat noch de „Protestwähler„, de mol so und mol so wählen doot, aber se mooken wenigstens mit, dat hebbt se de meisten vun de ach so opgeklärten Nichtwählers vörut. Ik bün mol gespannt, wie dat Rennen utgeiht – afrekent ward to´n Sluß, heet dat jo so schön.

Een ut de Politik mutt ik noch loswarrn- dat givt jo ok „Lokalpolitiker„, de mitmischen wüllt und denn so hitte Themen wie „Sitte und Anstand„ mit de Hölp vun een örtlichet Daagblatt op denn Disch bröcht hett – johrelang stohn se all an de B4 – de Füdderkisten mit dat rote Hart und nu plötzlich is de „öffentliche Ordnung„ ni mehr gewährleitstet, de Kinners vun de vörbifohrenden  Radtourer kunnen verdorben warrn und se hebbt denn mol eben in Optrag geben, een Sparrbezirk uttowiesen, dormit düsse Schwienigelei ünnerbunnen ward! Wat för een utsöchten Blödsinn! De Krönung is wedder Mol de „demokratische„ Vörgehenswies – „Wi hebbt dor nur een Anfroog stellt!„ hett dat toerst heeten, in Wohrheit hebbt se ohne irgendeen politischen Besluß denn doch de Optrag an de toständige Behörde geben! Worüm erinnert mi düsset Vörgohn nur an een schwatten Gemeindefürsten und siene Mitspeeler ut unse Gegend!?-Avers, Lüüd, ik heff de Lösung för dat Problem!!! Een poor Daag looter stünn in dat sölbige Daagblatt to lesen, dat se in Zürich de ersten „Liebesboxen„ inweiht hebbt. Dat sünd wohl so een Oart „Carport„, de no dree Sieten hin versloten sünd – se künnt doch an jedeen Wech, wo de Damen sik hinstellt, een Sichtschutz opstellen, mutt jo ni glix een Garasch sin. Denn hebbt se dree Fleegen mit eene Klapp tweislogen: De „weltverdarbende„ Deenstleistung is nich mehr direkt to bekieken(kunn man dat denn öberhaupt!?), de Wand kann för dezente (Wahl-)Werbung nutzt warrn und de Kundschaft, de ninich to sone Wieber föhrt, kann ehre Vehikels dorneben afstellen und se mütten sik nich in´t Holt versteken und sik  schon op denn Wech dorhin verutgaben! Een Nodeel hett dat ganze: De veelen dusend Kinner, de Johr för Johr op´n Drahtesel dor an de B4 vörbiföhren, mööten denn noch mehr in´t Internet gohn, üm sik to „informieren„.

Nu denn, vun eene ganz besondere „Hierarchie„ heff ik nülichst hört – vun boben no ünnen ward in de School anseggt, wat löppt – de Toiletten warrn nich mehr mit Seep und Papier utstaffiert, de Schöler süllt denn Parkplatz no „Falschparker„ afsöken und melden, de Schoolmeisters in eere Klassen sullen se utspekulieren und de Computerklass is vun een Dag to´n annern keene mehr -  is dat de School vun hüüt- wat is dat för een „System„?!  Woför hebbt de Öllern denn dusend und mehr Euro utgeben för een angnappelten Klapp-Appel? Keeneen hett nu in sin Tüchnis stohn, dat he in een Computerklass weer! Dat is wohl moderne Pädagogik! Dor kennt wi nix vun! Avers, wenn denn ok noch de ganze Roop vun de School so schlecht is, dat man de Schöler ut denn letzten Johrgang  vertellt, se sullen sik an besten nich in´n Landkreis för een Utbildung bewerben, denn stimmt dor nich nur´n beeten wat nich!

Wat stimmen deit wohl ok bi een annern wat nich. Dat een  Minsch ´n beten wunnerlich is und annere Lüüd mit komische Geschichten verunglimpfen will, dor heff ik all vun hört.  Avers nu is mi to Ohren komen, dat düsse een vertellt, he is mit Steen beschoten worrn. Is dat de Einsamkeit  oder harr he sik een antüddelt und hett „Irrbillers„ sehen? Viellicht weern de lütten gröönen Marsminschen dor und hebbt in sin Breegen rümraschelt!?  Oder dor is eenfach wat vun Boom fullen. Wer weet… Wenn ju also so eene komische Geschicht hört, künnt ju dat gliecks in de Kategorie „Märchen und Geschichten„ afleggen, denn ik kann mi nich vörstellen, dat keen sik an so een Minschen „vergriepen„ deit.

Op´n Sünndag vun de letzte Week weer ik mol na de Ellerndörper Hai hin – dor geev dat een plattdütschen Gottesdeenst vör´n Schaapstall. Dat hett mi richtig good gefullen, mutt ik seggen. De Sünn schien ganz blien vun Heben und de Paster hett good schnackt. Een Samaritergeschicht hett he vertellt, de em sülvst wedderfohren is. Dat hett mi richtig beröhrt. Een ganzen Dutt Leeder op Platt sünd ok sungen worrn, de Musik vun den Posaunenchor ut Bahnsen/Eimke hett dorto speelt. Fein hebbt jii dat mookt, Lüüd!  In Januar sall dat wedder een Gottesdeenst op Platt geben! Schood -  dat is man noch so lang hin!

So Lüüd, dat weer´t erstmol wedder -

lett jüm ni argern !

Bit to´n nächsten Mol und nich vergeten, de boberste Börgerpflicht notokomen-  an 22.September is vun Klock acht bit avends Klock süss Tied to´n wählen!!!

 

 

 

 

 

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: