Allens an´n Böön



PlattsnackerABMoin leeve Lüüd,

nu, in de Wintertied, is se wedder allerwegens to höörn – de Motorsoog is op´n Hoff und in´n Holt an orgeln und laarmen. In de Holten hett de Stormwind deelwies örntliche Löcker in´t Föhrenholt bi uns in Bargfeld rinwöltert. Dor liggt jümmers noch een Barg lange Bööm in´t Holt. De mütten se ok noch bargen und op jeden Fall de Wannerpaade wedder frie mooken – mit de grooten Wegens güng dat jo fix – dor weer de tokamen Dag al de Harvester dor und hett de Bööm vun de Fohrbohn sneen.

Man ok bi uns an de Kriesstroot hett sik de Blick ännert. Se hebbt de in Harvst anmoolten Bööm för denn niegen Radweg afmeiht. Se hebbt al fröh Klock veer anfungen und denn güng dat heel fix, dor weer´n de Meters op de Eer. Nu geiht dat also los – so veel scheune Bööm sünd weg… Avers dorför givt dat een Radweg no Gerdau. Ik hoff man blots, dat mi de Mallbüdels in eere knatternden Kissen nich vörher noch vun mien Isenpeerd scheeten. Vör allen so een kackbruune ES-JU-WI mit een olen Kerl achtert Stüer is mi wedder und wedder opfulln – de hett mi al een poormol so knapp vörbiföhrt, dat ik mi in  sien Buten-Speegel bekieken kunn – also heel dicht! Avers viellicht is de jo jümmers full und maarkt gorni, wat he sik dor trechfööhrt!? Denn mutt sik bit nächste Mol wohl de Peterwogen dorüm kümmern… Leeve und eische Autofohrers, de Stroot is nich alleen för ju dor! Hebbt jii dat al mitkreegen???!!!

Irgendwie nich so veel mitkreegen – dat doot se jo ok bi de Kloogsnackerie üm denn dorsigen Trassenwahn. Ünnern Strich ward se all achtert Lücht führt – avers se hebbt dat Gefööhl, dat se all de grooten Rieters sünd. Wedderstand is jo wichtig – keene Froog – an Sluß ward denn doch dat buut, wat se wüllt. Düsse „Varianten„ sünd all nur Störfüer, üm de Lüüd heel dörcheneen to bringen. Dat denk ik. Avers se doot wat för de „soziale Gruppe„ – de Lüüd rotten sik tosomen und hebbt een Thema för sik opdoon, över dat se snacken und tosomen doon künnt – und dats doch ok fien. Find ik. Nich jümmer nur blöd RTL kieken.  Avers, mi is opfulln, dat de BI´s „eere Strecken„ nich in Schuss hooln – veele vun de Krüüze und Schillers liggt al siet Wuchen in´n Schiet odere hangt op halvigacht und keeneen but se wedder op. Wats dor los!? Is de Luft al rut!? Man to, man to – so mookt dat so een Indruck vun „dat bringt sowieso nix!„. Kann doch nur eener in de Forumslacht trecken. De annern mütten tohus de Scholl inne Reeg hooln. Oder hebbt jii doch al opgeeven, ju Krüüzritters!?

Een anner Slacht ward jo in de Samtgeeen ok utfochten – dor koom ik denn nu noch eenmal op denn Wegebu för de Röö trüch – De Kriesdagsbisitter Drögemüller hett in Bargfeld op de Börgerversammeln (jo, ok dor geev dat een!) und wohrschienlich ok annerwegens, anseggt, dat beide Wege buut ward – Bahnsen- Bargfeld und ok de anner Weg twüschen Böddenstedt und Soborg. 2018 sünd de all ferdig – hett he seggt. De Ole-Männer-Garde striet sik jo ümto wedder, wölke Weg nu Vörrang hett und wölke Minsch wo nu wedder wat verdreiht hett und denn anner övert Ohr hauen will. Ik bün froh, wenn dat bit 2018 all buut is und de Reehenfolg is mi dor sowat vun egol. Dat dat in dree Johren all trech sien sall, dor  mook ik mi avers doch´n Kopp över – kann dat möglich ween!? Woneem sall dat Geld ut de klammen Soborger Kassen denn noomen warrn? In Tosagen geeven und Beslüsse faten sünd de Politikers doch all liek – und in´t tokamen Johr is Kommunalwahl! Markst Müüs!?

So, nu loot jüm man ni argern-

bit to´n nächsten Mol

Niels

 

Print Friendly, PDF & Email

2 Kommentar


Götz Schimmack
03/16/15

Mien leeve Niels,
du vertellst uk vun de beiden Rööweg, de de Politikers de Lüüd von Seborg tauseggt: de een vun Bohnsen no Bargfeld un de anner
twüschen Bernste un Seborg, un dat se sik strieden, welke Weg nich soveel bedüüdt. Du schrievst: “ … de Reehenfolg is mi dor sowat vun egool.“
Na, na ! In’t Blatt vun Uelzen vun 3.12.2014 S.2 hev ik dan ganzen langen Leserbreef vun dik leest, over dor schrievst du: „Bargfeld ist ganz klar im Vorteil.“ Worüm hüüt anners? Wör doch richtig
domols !
Pass bloß up. Du büßt nich Odenauer ( Adenauer ), de mol seggt hett: „Was kümmert mich mein Geschwätz von gestern?“
Over nu arger dik man nich.
Götz


Niels Tümmler
03/17/15

Mien leeve Götz,

dor hest du op dat erste Lesen ok recht. Ik find ok wieterhin, dat de Weg in Bernstedt nich not deit! Dat heff ik so seggt und schreeven und meent!
Mit dat „sowat vun egol“ wull ik nur to´n Utdruck bringen, dat ik mi op all de Wegens freien do. De Reeg, in de dat buut ward,tja, dat is sowat. Ik denk, de sünd sowieso nich bit 2018 ferdig.

Beste Grööten

Niels

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: