Advent kümmt to Been!



PlattsnackerABDag ook, leeve Lüüd,

nu is se wedder dor, de Adventstied. To´n Instand geev dat am Sünnavend dorvör een Singen in de Soborger Kark. Is sachs good ankamen, hett keen mi vertellt. Ik kunn nich dorbi ween. Schaad! Aver an Sünndag har ik ok een fien Belevnis. Plattdüütsch Gottsdeenst in Repenstää. Dat weer moij. Grooten Optuch geevt dor. Paster Scheller ut Harmsborg hett Predigt, ik heff de Lesen mookt und Musik geev dat mit de Musikers üm mien Fründ Kloos Stehr („Noordlücht„) und de Blickbläsers vun de Karkengemeen. Een scheune Stünn in een good besöchte Gottsdeenst. As ik denn, Klock twölf weert al, to Hus keem, geevt een nich so moij Överraschen  – Een Köter ut de Nabarschap weer utreeten und hett een vun unse Höhners vör de Stall tofaat kreegen. Afmurkst hett dat Mist dat Deert. Dat weer truuri und nu harrn wi to´n Ingang vun de scheune Adventstied een Huhn to Graff to böörn. Aver as denn faken so is – erstmol keen seggen wat een dat Leed deit und  de utbüxte Jagdköter harr nich de Schuld, is kloor. Wi sülm hebbt dat rutfoddert, wi lett de Deerten ja frie rümloopen! Ik harr denn ok nich de Kopp, mi dor noch mit utneentosetten, ik müss ja noch to Arbeit. Scheune erste Advent weer dat! harr ik mi een beeten wat anners vörstellt, wat de Dag woll wiedergahn sall… Aver, wo heet dat  – Kannst nix bi maken, schittst in Hemd, schittst in Laken – schittst vörbi is ook een Swienerie. Twee Daag achterher keem denn doch noch een Pardon, so weer tominst dat Nabarween wedder op de Reeg.

Een anner Swienerie is aver sachs ook dat Lüüdbeschieten vun de groote Volkswagen-Konzern, wat se ehrweeken opdeckt harrn. Und dor kümmt jümmers noch wat dorto, aver de Aktienkurs stiggt al wedder und de AG verdeent sik wedder un wieter dumm un dusselich. So is dat  even, hest wat, bist wat un de Düvel schitt jümmers op den gröttsten Hupen. Nülichst harr ik mol wedder so een negere Blickkist vör mi; „blue motion„ stünn dor achter op de Klapp op. Und dor har ik denn dat Geföhl, dat se viellicht gor ni richti bedragen hebbt. Wat weer denn, harr ik so simmeleert, wenn se de Kööpers vun vörnrin al ankünnigt harrn, wat se vörhebben doot – de Managers sünd doch bewannert in Party un Puff un sowat, dor weer doch ok al mol watt bi VW. Dor harrn se viellicht al de Infall born as se blau weern, wat se de Lüüd beschieten wüllt. Und denn hebbt se de Programmierers „in motion„ sett, de denn sachs nich mehr blau weern, denn dor höört ja een Barg kriminelle Energie to, so een Beschieterprogramm to schrieven. Orer dat weer noch een beten anners:  „motion„ seggt de Ingelsche ja ok to „Schiet„, op Hochdüütsch „Stuhlgang„. Hebbt se dat viellicht dormit utdrücken wüllt!? – „Wi weern blau, as wi uns denn Schiet utdacht hebbt„ – „blue motion„ even! Und mol ehrlich -de Ümwelt is de mersten Lüüd doch sowat vun egal, wenn´t üm  dat leevste Kind vun de Düütschen geiht- de gröttste Afsatz hebbt de Autobuers doch mit de grooten Potenzschaukeln. Und dor is´t sowat vun schietegal, wat du twölf orer fofftein Liter dörchneihst- dat is all toveel.

So, leeve Lüüd, nut lett jüm nich argern -

ik wünsch juu all een besinnliche Advent- und Wiehnachtstied und al mol een goode Rutsch in 2016 (blots keen „blue motion„, dat weer denn keen goode Start in tokamen Johr).

Bit tokamen Johr!

Niels

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: