Advent, Advent, hebbt de Socken sik ver(b)rennt!?



Moin leeve Lüüd,

nu is dat also amtlich – nächst Johr ward een niege Börgermeister för de Samtgemeinde söcht und dat ward nich de ween, de düssen Posten nu noch besetten deit. – Wokeen sik dor wohl finnen mach, de sik dat andoon will!?

Eenfach ward dat wohl nich, denn he mutt jo mit een Barg Lüüd vun de Räte klorkomen, de nich nur een Stebel Erfahrung, nee, ok noch veel mehr Starrköppigkeit an denn Dagg legen. Denn bit op een poor Utnahmen hannelt sik dat Ratswesen doch üm een Hupen ole Mannslüüd, de an eere Posten fastholen und jüngere Fruuns und Kerls wechbieten oder de no kotte Tied keen Lust mehr för düsset Gehampel hebbt. Und nich nur dat, sogor de Börger, de sik för een Ehrenamt mellen doot, koomt nienich to´n Zuch, denn de „Ratsvertreter“ schachert sik de Posten leever sülm to – so weer dat jo all bi de Posse üm de Besettung vun Schöffen düsset Johr.

Dat ward nich eenfach för denn niegen Macker, alleenig dat Malheur mit de Fürstentümer Eimk und Gerdau mutt he ganz sacht angohn. Mookt he dat as de jetzige, jümmer de Fohn in de Wind hängen und sik eere Durchlauchtigkeiten anbiedern!? Oder hett he dat Krüüz de mol de Stirn to beeten!? Man döff gespannt ween…

Genau so gespannt weer ik op dat ganze Speel üm de Afstimmung vun den Roten Socken. Wat wöör dor spekuliert und wat sünd se inknickt… Ik heff de een oder anner dorop anschnackt und een ganze Barg hett mi vertellt:“Eentlich bün ik jo dorgegen, dat ward nix dullet för de SPD– avers, ik heff trotzdem mien Krütz bi „Ja“ mookt!“ WAT IS DAT DENN!? Ik dacht, ik hör nich richtig! Sogor biet Afstimmen in de eegen Reihen sit de Lüüd Angie op de Schuller und flüstert se in´t Ohr: „Wenn Du dat Speel ni mitspeelst, givt dat Niewohlen und denn kümmt de , Du weetst all –  de Tüffel Achtein, wedder in denn Bundesdagg. Ik heff mien Wohlvereen, und wenn jii nich mit mi speelt, denn nehm ik mi een anner Bruut!“ De Geist vun Mutti schwewt alltied öbert Land, wi vör Joohrn all de vun denn Altbörgermeister vun Köln; Konrad hett de heeten… De harr ok sien Kanzlerwohlvereen. De hütige mutt sik nur noch een anner Farv mit in dat schwatte Boot inladen.

Veel Vertellen und nix mooken – dorin is se good, avers so weer dat bi eern Förderer, Birne nöömt he in Volksmund, ok all. Utsitten – de Dütsche Michel wählt eer doch… Und wat is nu mit de SPDisten!? Een ganz Deel hebbt nich eer Krütz mookt und een Viddel hett „Nee„ seggt. Is dat so grootartig as de Dicke dat nu dorstellt oder is dat GroKotz!? Hochmut kümmt vör de Fall. Immerhin hebbt se de schwatten Dübels jo süss Ministerposten afrungen. Weer dat nu geschicktet Taktieren oder hett de Kanzlerin dat extra so mookt – denn kann se vör de nächsten Wohlen wedder seggen: „Kiek – de SPD – dor hebbt wi se mit grötstem Vertruen de besten Posten afgeben und wat hebbt se dorut mookt!?- Leeve Wählerinnen und Wähler, de Christdemokraten kunnen nix dorför, jii mööt us wählen und de SPD endgültig in de Mottenkist verbannen – nur so ward dat (de Rieken in…) Düütschland goot gahn!„ Allens Goode wünsch ik de Sozialdemokraten!

Noch wat anderet, wat avers ok in düt Land passt – vundaags weer dat in Radio jümmer wedder to hören – an Nummer een in de Norichten stoohn nich de Skandale üm de Quälerie vun de Dierten oder de Börgerproteste in de Ukraine oder de menschenunwürdige Ümgang mit de Flüchtlinge und Minderheiten, nee – een riesige Opriss vun den geschassten Herrn Wulff, de sik wegen een poor Euros in een grootet Verfahren verantworten mutt – dat is de gröttste Schlagzeil und dor ward stündenlang öber lamentiert – dat is Düütschland!!! Na denn man Frohe Wiehnacht!!!

So, nu heff ik weer´n beeten groote Lage mookt und wat gifft sonst so!? – Wi weern an Dörteinsten mol in Ebsdörp to´n „Kalenderfenster opmooken„ – Dat weer in een Isenwarkstä  -dor harrn se butten een Füer schürt, binnen geev dat Punsch, Kakao, Schmoltbroot und Keks und wer wull kun sik ok noch een dünnen Pannkoken mooken looten – de nömt denn „Crêpes„… Dor wörn wi as Utwärtige toerst ´n beten scheel ankeeken,avers denn doch fründlich opnohmen in de Rünn. Avers de eentliche Grund weern jo mol wedder de beiden Kandidels Uli und Hannes. Nülichst in de Gerdauer Kark harrn se all so fein opspeelt und nu een Konzert „anplackt„ in een Warkstä!!! Een ganze Stünn hebbt se speelt, vun plattdütschen„Klassikern„ bit to Wiehnachtsleeder und de een oder anner Blues op Platt – „Too scheun!„, seggt Uli jümmers!

In Bargfeld weer ok een lüttje Wiehnachtsmarkt – dor weer een ganz besondere Stand dorbi – dor kunn man een Barg erfohren öber Krüder und Kreativet – scheune Sooken kööpen – Anhängers ut Immenwass, selbstmookte Bio-Orangen-Gelee und Peeperkoken… Und wer wull, kunn sik sülm kreativ een Appelsin besteeken oder wat ut Wassplatten utsteeken. Ik hoff, dat de Krüderfru noch oftens wat anbeeten deit. Wör mi freun!

So, ik wünsch jüm all een besinnliche Wiehnachtstied und een gooten Rutsch in´t niege Johr -

lett jüm ok dütmol nich argern-

bit to´n nächsten Mol-

 

 

Niels

 

 

 

 

 

 

 

Print Friendly, PDF & Email

Hinterlasse einen Kommentar zum Beitrag

Andreas Paschko (ap)


Gründer und verantwortlicher Redakteur

DIE ZEITUNG wird seit 1994 kostenlos in alle Haushalte der Samtgemeinde verteilt. Sie steht für eine unabhängige, kritische redaktionelle Berichterstattung.
Gleichzeitig dient sie Vereinen, Gruppen und jedem Einzelnen der Region als Medium für unverfälschte Meinungen, Berichte und Mitteilungen.

Auf SUDERBURG-ONLINE wurden ab 1997 ausgesuchte Artikel der ZEITUNG veröffentlicht.
2012 erfolgte der Umbau zum heutigen Blog mit tagesaktuellen Berichten und Meldungen aus der Region.

Beiträge ap: